Paglalagom.

Maayos ang 2011 ko. Mahirap para sa akin ang aminin ito; marahil dahil nahirati na rin sa mga hindi magagandang bagay, at parang pagta-traydor sa mga hindi mapapalad na kaibigan at kakilala ang pag-angkin na maganda ang taon mo. Siguro dahil finite nga ang kasiyahan (tulad ng natural resources), at sa pagkuha ng higit sa nararapat ay waring ninanakawan mo ang iba.

Pero maayos nga ang 2011 ko.

Sa susunod na ang mga partikularidad. Sa simpleng paglalagom, maayos ang naging takbo ng taon. Bago magsimula ang 2011, naalala kong na-interview ko para sa isang raket si Joy Lim, ang wagas na supplier ng charms and crystals sa mga artista. Maswerte raw ang mga Tiger sa 2011. Binigyan din nya ko ng bracelet para sa kalusugan (na ibinigay ko sa Lola ko), at pinaalalahanang laging magsuot ng pulang sapatos at magdala ng gunting. Ewan ko lang.

At sa kaayusan ng 2011, dalawang taon nang magkasunod na maayos, dahil OK rin ang 2010 (at kung paniniwalaan ang ilang Chinese horroscope, magiging maayos din ang 2012 dahil magkaibigan ang Tiger at Dragon). Bahagyang hinihipo ako ng sabik tuwing iisipin ang paparating na taon, dahil mukhang sumasaya ang mga bagay matapos ang pangit na 2008 at 2009. Baka nga nagiging positibo na ako sa buhay. Naku.

*May dalawang taong nagreklamong masyado na raw seryoso ang blog na ito. At nakaka-miss ang LJ. Ako rin, namimiss ko ang kahangalan ng LJ ko.