--

Ang Ibig Sabihin ng Lungkot

Tanda ko ang mabilis-mabagal na pag-ulan ng bulak sa Abril 

kasabay ng iyong tagubilin: “Ang susi ay nasa ilalim lamang 

ng marungis na paso sa ikatlong baitang.” Sa nais tuntunin 

ng mga ligaw na bulak sa hangin, animo’y walang bigat 

ang katawan, walang grabidad ang nahamugang lupain. 

Ano ang kakatwang kahulugan ng paglipad ng bulak 

kung hindi ang kawalan nito ng pakpak? Kung hindi 

ang sandaling kalayaan mula sa napipintong paglapag. 

Sa ngayon, kung kailan nakapinid ang mga daan 

at paraan tungo sa iyo, ang mga pasilyo’t siwang 

na dati’y daluyan ng mga hiwatig na ngayo'y iwinaglit 

sa hangin, tulad mo, tulad natin, mahal, saan ang daan 

tungo sa nakaraan? Ano ang silbi ng malalamyang kumpas

ng bulak sa malaon nang ikinandadong pintuan?